Ұлттық аза тұту күні

Әр қазақ менің жалғызым.... 

Иә, алапат індет арамыздан талай асылдарымызды жұлып әкетіп жатыр. Осы орайда  қара жамылып отырған азаматтар мен олардың отбасыларына қайғырып көңіл айту үшін мемлекет басшысы Қ.Тоқаев 13 шілде күнін ұлттық аза тұту күні деп жариялады. 

"Біздің күресіміз жалғаса береді. Бұл індетті адамзат жуық арада жеңе қоймас. Алайда уайым мен қайғыға батып, түрлі қауесеттерге сеніп, еңсені түсіруге болмайды. Салмақты, сабырлы болайық. Біздің жұмысымыз айқын. Қоғам алдында ешнәрсені жасырмай, ашық айтамыз. Болашақта да солай болады. Бүкіл күш-жігерімізді жинап, күресе беруіміз керек, - деді президент. Сонымен қатар мемлекет басшысы ел арасында тарап кеткен бос әңгімелер мен жалған ақпараттар жөнінде де баса айтып өтті. Өкінішке орай кейбір азаматтарымыз алып-қашпа әңгімелер мен жалған ақпараттарға сеніп кетті. Осы орайда мемлекет басшысы Қылмыстық кодекстің 174-бабына сәйкес, жалған ақпарат таратқан адам жауапқа тартылатынын, сондай-ақ құқық қорғау органдары ел ішіндегі осындай келеңсіздіктерге жол берген азаматтар мен  карантин режимін бұзғандарға қатаң шаралар қолданатынын ескертті.

Құрметті қазақ елі!  Жақыныңа жанашыр бол. Ең бірінші байлық - адам өмірі және оның денсаулығы. Ол үшін баршаңызды пандемия кезеңінде жарияланған карантин шараларын, сақтық, қауіпсіздік шараларын өзіміз үшін де, өзгелер үшін де барынша жауапкершілікпен орындауға шақырамын. Сонда ғана біз елімізді, жерімізді, ұлтымызды толыққанды сақтап қала аламыз. 

Алматы облысы, Іле ауданы, М.Түймебаев ауылы, N19 орта мектеп директоры М.Бейсенбаева